Ладыш Анжэла Аляксандраўна – майстар народных промыслаў, на працягу 15 гадоў з’яўляецца нязменным кіраўніком гуртка “Остров вдохновения” і амаль столькі ж гадоў пад яе кіраўніцтвам працуе студыя “Школа ткацтва” ў Пагародзенскім цэнтры культуры і народнай творчасці. З’яўляецца носьбітам элемента нематэрыяльнай культурнай спадчыны “Традыцыйныя ткацкія тэхнікі вырабу шматколерных посцілак і дываноў у аг. Пагародна Воранаўскага раёна”, занесенага ў 2018 годзе ў Дзяржаўны спіс гісторыка-культурных каштоўнасцей Рэспублікі Беларусь.

Анжэла Аляксандраўна нарадзілася 06 студзеня 1972 года ў вёсцы Беняконі Воранаўскага раёна Гродзенскай вобласці, дзе атрымала сярэднюю адукацыю. Пасля паступіла ў Гродзенскі дзяржаўны каледж мастацтваў. Пасля яго заканчэння Анжэла Ладыш была накіравана на працу ў Дом культуры вёскі Даўгялы Воранаўскага раёна, а затым у аг. Пагародна. Больш за 30 гадоў майстар адданая сваёй справе: шчыра працуе на культурнай ніве і беражліва працягвае традыцыі продкаў.

Першыя навыкі ткацтва Ладыш А.А. атрымала ад народнага майстра Міхно Станіславы Вікенцьеўны (1932-2022), якая ў свой час дапамагала развіваць старажытнае рамяство ў аг. Пагародна і працавала майстрам народных промыслаў. Пасля ўстойлівага і дасканалага засваення традыцыйнай тэхнікі ўзорнага ткацтва Анжэла Аляксандраўна пачала выкарыстоўваць у сваіх работах індывідуальныя формы і ўзоры.

Творчасць Анжэлы Аляксандраўны добра вядома многім не толькі на Воранаўшчыне, але і далёка за яе межамі. Ладыш А.А. – пастаянны ўдзельнік раённых, абласных, рэспубліканскіх мерапрыемстваў, на якіх можна не толькі палюбавацца прыгажосцю тканых вырабаў, але і павучыцца рамяству на майстар-класах. У кожную сваю працу Анжэла Аляксандраўна ўкладае ўсё сваё ўменне, руплівасць і часцінку душы.

А.А. Ладыш прымала ўдзел у такіх мерапрыемствах, як:  рэгіянальнае свята-кірмаш вырабаў рамеснікаў “Гродзенскія традыцыі да свята Вялікадня” (г. Гродна, 2019 г., 2022 г.), абласныя “Дажынкі-2019” (г. Смаргонь), рэспубліканскае свята “Купалле” (“Александрыя збірае сяброў”) (аг. Александрыя Шклоўскага раёна Магілёўскай вобласці, 2021 г.), рэспубліканскі фестываль народнага гумару “Аўцюкі-2021” (аг. Малыя Аўцюкі Калінкавіцкага раёна Гомельскай вобласці). Дэманструючы працу за кроснамі, Анжэла Аляксандраўна знаёміла шматлікіх гасцей з народным рамяством сваёй мясцовасці. Два разы пераемніца народнага майстра наведала міжнародны фестываль “Славянскі базар у Віцебску” (г. Віцебск, 2022 г., 2023 г.), дзе прадставіла не толькі свае навыкі ў ткацтве, але і адлюстравала багатую культурную спадчыну Воранаўскага раёна.

Увогуле, Анжэла Аляксандраўна не пакідае без увагі святы і фестывалі, якія праходзяць як на Гродзеншчыне, так і на тэрыторыі ўсёй краіны: рэгіянальнага свята народнай творчасці “Ад прадзіва да ткацтва”    (г. Гродна, 2023 г.), першы абласны літаратурна-краязнаўчы форум “Воранаўскія чытанні” (г.п. Воранава, 2023 г.), Рэспубліканскі фестываль нацыянальных культур (г. Гродна, 2024 г.), “Гудзевіцкі тэкстыльны фэст” (аг. Гудзевічы Мастоўскага раёна, 2024 г.), рэгіянальны фестываль традыцыйнай культуры “Скарбы Гродзеншчыны” (г. Гродна, 2024 г.), “Марафон адзінства” (г. Ліда, 2025 г.), святкаванне 85-годдзя Воранаўскага раёна (г.п. Воранава, 2025 г.) і інш. Майстар ахвотна праводзіць майстар-класы па ткацтве, актыўна транслюе і папулярызуе веды аб народных рамёствах, далучае маладое пакаленне да ўдзелу ў культурным жыцці роднага краю.

На працягу 13 гадоў А.А. Ладыш праводзіць майстар-класы па ткацтве для ўсіх жадаючых у пакоі-музеі “Тут Радзімы маёй пачатак” у Пагародзенскім цэнтры культуры і народнай творчасці. Вялікім попытам у гасцей Воранаўскага раёна сёння карыстаецца турыстычны маршрут “Дарогаю продкаў” з удзелам Анжэлы Аляксандраўны. Захапленне сваёй справай і прафесіяналізм майстра натхняе многіх на актыўны ўдзел ў захаванні і распаўсюджванні культурнай спадчыны.

А.А. Ладыш была госцем тэлеперадачы “Окна города. Традиционное художественное мастерство – ткачество” (2024 г.), з’яўляецца ўдзельнікам праекта “Хит белорусской кухни. ПУТЁВКА BY” (2024 г.) і “Як ствараюць унікальныя дываны на Гродзеншчыне” (2019 г.) на канале СТБ. Дзейнасць майстра была адзначана Ганаровай граматай упраўлення культуры Гродзенскага аблвыканкама (2022 г.), пасведчаннем аб занясенні на раённую Дошку гонару (2023 г.), падзякай за ўдзел у свяце “Гудзевіцкі тэкстыльны фэст” сектара культуры Мастоўскага райвыканкама (2024 г.), дыпломам за актыўны ўдзел у заключных мерапрыемствах ХIV Рэспубліканскага фестывалю нацыянальных культур (2024 г.).

За сваю працаздольнасць, добразычлівасць і творчую энергію Ладыш А.А. карыстаецца заслужаным аўтарытэтам і павагай сярод калег па працы і работнікаў культуры раёна.